Fem år etter at Helse Vest fekk pålegg om å bruke nynorsk i sine føretak går det i nynorsk og bokmål om ein annan. Språkrådet ber helseføretaket skjerpe seg.
Erlend Bakke frå Askøy har tipsa Språkrådet om at Helse Vest enno ikkje har greidd å bruke nynorsk konsekvent, og han viser mellom anna til skiltet over universitetssjukehuset kor det framleis heiter «Haukeland Universitessykehus». På nettsidene til Haukeland blir det brukt nynorsk og bokmål om ein annan. No har Språkrådet tatt tak i saka og vil be Kulturdepartementet følgje opp pålegget dei gav Helse Vest i 2004.
Kommunikasjonsdirektør i Helse Bergen, Mona Høgli, lovar på si side at føretaket skal følgje opp og bruke nynorsk meir konsekvent. Mellom anna skal Haukeland få nye heimesider over nyttår.
– Då vil vi vera der vi skal når det gjeld nynorsken, seier Høgli til bt.no.
I høve skilting så vil skilt med bokmålstekst bli byta ut etter kvart som det er naturleg å gjere det.
