Sandøy kommune melder seg no inn i LNK. – LNK har ein god del faglege tilbod som me kan nyte godt av, seier rådmann Lasse Larsson Fjørtoft.
Sandøy har lang historie som ein bevisst nynorskkommune. Og rådmann Fjørtoft meiner difor det er på høg tid dei også blir medlem i LNK.
– Det er viktig for oss å pusse støv av signaleffekten som eit medlemskap kan gi både innad i organisasjonen, men også utad. Me har nynorsk både som opplæringsspråk og administrasjonsspråk i kommunen, men me opplever også eit trykk av bokmål. Mange av ungdommane våre vel også bokmål når dei går frå ungdomsskulen og over til vidaregåande.
– Så dette handlar også om å gi ungdommane våre ein god språkleg ballast, slår han fast.
Han viser til at kommunen heile tida må jobbe med språk, og vere bevisste på at dei er ein nynorskkommune.
– Den språklege profilen vår gjer seg ikkje sjølv. Dette handlar også om at nynorsk er det skriftsspråket som ligg tettast opp mot talemålet vårt.
