Dei siste to åra har Kulturdepartementet bestilt 25 rapportar for til saman 18,6 millionar kroner. – Kulturpolitisk går me ei spanande tid i møte, seier forskar.
Det viser eit oversyn Kulturdepartementet har laga for Aftenposten.
Stortingsmeldingar om film og allmennkringkasting har vore viktig for statsråden, i tillegg er ein nasjonal bibliotekstrategi på veg. Før kringkastingsmeldinga fekk Widvey tre rapportar om NRK, og det enda i eit utval som skal sjå nærare på finansieringa av NRK.
Kulturforskar ved Høgskulen i Sogn og Fjordane, Georg Arnestad, seier det har kome mange utgreiingar på felta statsråden ønskjer å utvikle, men meiner det har skjedd lite på dei store, tradisjonelle kulturfelta som scenekunst og museum.
– Ho har næringslivsbakgrunn og fyller det mandatet ho truleg har fått frå statsministeren om å utvikle næringspolitikken i kulturen. Dei neste to åra vil kulturfeltet vere prega av privat finansiering og eit større samarbeid mellom det offentlege og private, seier han til avisa.
Statssekretær Bjørgulv Vinje Borgundvaag (H) meiner 18,6 millionar kroner på 20 månader ikkje er særleg høgt, og meiner dette viser at statsråden jobbar raskt og vil utrette mykje. (©NPK)
