4.000 var innom årets utgåve av Falturiltu.
– Ei strålande festivalveke er over – proppfull av utstillingar, konsertar, skulebesøk, opplesingar og opera. Den rike nynorske barnelitteraturen har blitt grundig feira for sjuande gong, og blant dei mest populære arrangementa i år var HSH-operaen «Walkman», opningsfesten, med bl.a. Frode Grytten og festivalforfattar Einar Økland, og Finn-Erix m/gjestene Are Kalvø og Oddvar Torsheim, seier Kaldestad til Sunnhordland.
Totalt har 4.000 fått med seg dei ulike arrangementa, noko som er ei auke med 2.000.
– Kari Stai og Atle Hansen sytte for at dei yngste fekk oppleva kvalitetslitteratur og elles var dei bokaktuelle forfattarane og illustratørane Helga G. Eriksen, Ragnar Hovland, Atle Berge, Tor Arve Røssland, Sunniva Relling Berg, Hanne Bramness, Martine Grande, Anna R. Folkestad, Per Olav Kaldestad, Bente Bing Kleiva, Akin Duzakin, Øystein Runde og Åshild Kanstad Johnsen i sving i løpet av festivalen, legg han til.
– Kulturskulen trekte mykje folk til sin konsert, og dei var også synlege i bybiletet med spontane dikt-, musikk og danseinnslag. Galleri Giga hadde utstilling med illustrasjonar frå Økland sine tidlege barnebøker, Fitjar vidaregåande hadde laga strålande smykkeutstilling, og flotte utstillingar var det også av HSH-studentar og alle tredjeklassingane i Stord kommune. Alt inspirert av festivalforfattaren sine tekstar og temaet for årets festival «Eg fann, eg fann!».
