Eit tysk storkonsern har funne olje utanfor Florø. Næringslivet håpar funnet kan bety starten på eit oljeeventyr i Sogn og Fjordane.
Leitesjef John Clark i det tyske konsernet RWE er full av lovord om funnet.
– Eg kan i alle fall seia at det er få funn som ser så lovande ut, som er utbygd på norsk sokkel, for å seia det slik, sa han då ha orienterte medlemmene i Norsk Petroleumsforening i fylket, fortel NRK.
Nettsida offshore.no fortel at førebels utrekningar viser at Titan-feltet, som oljefeltet er kalla, er på mellom 12,5 og 63 millionar fat oljeekvivalentar. Dersom oljeprisen held seg på 80 dollar fatet, betyr det at funnet kan innehalda olje som er verdt mellom 5,9 og 30 milliardar kroner.
Funnet er rundt ein prosent av reservane på Ekofisk-feltet.
For næringslivet og politikarar i Flora kommune betyr det auka tru på framtida.
– Eg er veldig optimistisk. Dette var kjekt å høyra, og eg har stor tru på framtida, seier ordførar Bente Frøyen Steindal.
Også Bjørn Hollevik i Flora industriforeining gler seg over nyheita.
– For meg som har arbeidd i denne bransjen i 25 år, har eg aldri hatt meir framtidstru enn akkurat no, seier han. (©NPK)
