NRK vil kutte dei lokale morgonnyheitene på radio frå fem til to minutt. Det meiner journalistane vil gi lyttarane eit dårlegare tilbod.
Nedkortinga av sendetida kjem i samband med at NRK skal samkøyre nyheitssendingane til distriktskontora på P1 klokka 7.03 og 8.03 med sendingane på digitalkanalen P1+.
Journalist Oddgeir Øystese i NRK Hordaland meiner kuttet vil føre til eit dårlegare nyheitstilbod i NRK.
– Det er provoserande at mens andre mediehus kuttar på grunn av økonomien, så kuttar vi i nyheitstilbodet vårt ut frå ein kommersiell medietankegang. Behovet for sterke regionale medieformidlarar er større enn nokon gong, seier Øystese til NRK.
Fungerande kringkastingssjef, distriktsdirektør Grethe Gynnild-Johnsen, er ikkje einig i kritikken og seier avgjerda er basert på analysar av publikumsønske.
– Det er teknisk umogleg å tilby publikum distriktsnyheiter utan å formatere sendingane likt i P1 og P1+. Det betyr på ingen måte at lokalnyheitene på P1 er nedprioriterte, seier Gynnild-Johnsen, som strekar under at distriktskontora framleis skal ha ei samla sendeflate på seks timar.
– Eg trur at publikum uansett er så glade i radio at dei kjem til å følgje med på sendingane våre, seier Gynnild-Johnsen. (©NPK)
