Landbruksminister Sylvi Listhaug er ikkje aleine i den nye regjeringa om å komme frå PR-bransjen. Ni av dei 38 statssekretærane i Solberg-regjeringa gjer det same.
Blant dei nye politiske rådgjevarane til statsrådane har 4 av 14 bakgrunn frå PR-bransjen, skriv Klassekampen.
– Eg opplever dette som ei enorm anerkjenning av bransjen vår. I Geelmuyden. Kiese har vi rekruttert the best and the brightest i 25 år, og det er lurt av den blåblå regjeringa å trekkje vekslar på desse talenta, seier PR-nestor Hans Geelmuyden til avisa.
Geelmuyden meiner makta i norsk politikk har flytta seg frå partia og over til PR-bransjen.
– Politikk vert laga på nye måtar i 2013, og dei politiske partia har ikkje lenger monopol. No vert politikk laga på nye arenaer. Kommunikasjonsbyråa er ein viktig del av denne dynamikken, seier han.
Geelmuyden meiner ikkje bransjen har fått for mykje makt.
– Pressa kallar det påverknad, men vi kallar det medverknad. Vi medverkar til nye regulatoriske løysingar for korleis makta vert utøvd i samfunnet. Slik er vi med på å lage ny politikk, seier han.
I tillegg til dei ni statssekretærane som er henta frå PR-bransjen, kjem tre personar direkte frå jobbar som journalistar eller redaktørar. (©NPK)
