Går inn for å gjera dei store byane endå større.
– Me må skapa nye slagkraftige bykommunar alle stader i landet der byar og omland har vakse saman til felles bu- og arbeidsmarknadsregionar, seier NHO-sjef Kristin Skogen Lund.
NHO vil setja likskapsteikn mellom eit byområde og éin kommune. Alt etter korleis ein definerer reisetid og pendlingsomfang, så meiner NHO at Noreg kan sitja igjen med berre rundt 100 kommunar.
– Næringslivet bryr seg ikkje om grenser. Dei bryr seg om effektivitet, arbeidskraft og marknader, seier Skogen Lund i ei pressemelding.
I dag er det 428 kommunar i Noreg, og kommunestrukturen har stort sett vore uendra sidan 60-talet. Samstundes har oppgåvene auka i omfang, spesialiseringsgrad og kompleksitet.
– NHO meiner at det som må bli gjort er å la bu- og arbeidsmarknadsregionar utgjera det geografiske grunnprinsippet i kommunereforma, held Skogen Lund fram.
Om NHO får viljen sin, vil Bergen eta opp Askøy, Øygarden, Fjell, Sund, Austevoll, Os, Osterøy, Samnanger, Fusa og Vaksdal. Stavanger vil òg omfatta det som i dag er Sandnes, Sola, Randaberg, Kvitsøy, Finnøy og Rennesøy.
Her kan du sjå korleis NHO har teikna kommunekartet rundt Stavanger:
