Under litteraturfestivalen i Aurland kunne ein oppleve attraksjonar som Linda Eide, Åsleik Engmark, Tove Bakke og multikunstnaren Oddvar Torsheim.
– Hovudsakleg inviterer me berre artistar på scena som nyttar nynorsk i skrift, men sidan Nynorske litteraturdagar er eit inkluderande arrangement, har vi teke til oss Åsleik Engmark sidan han også har ein fin dialekt, seier prosjektansvarleg Arve Tokvam til LNK-avisa.
Nynorske Litteraturdagar i Aurland som vart arrangert sist helg sette publikumsrekord i år, noko Tokvam er godt nøgd med.
– Me er strålande nøgde og har opplevd å selja fullt hus på fleire av arrangementa. Også forlaga har merka at det var vore fleire vitjande i år, og har såleis fått selt fleire bøker, seier Tokvam, som vidare avslører eitt av triksa som gjer at forfattarane kjenner seg godt mottekne; ein frivillig guide for kvar enkelt når dei kjem til arrangementet. Prosjektgruppa er difor godt nøgd, totalt sett, seier han.
Tokvam ser også framover.
– Me jobbar heile tida med å forbetre festivalen, men det står og fell litt på den politiske viljen til å satsa på prosjektet. Når det er sagt, vert det nok vanskelegare å leggja ned når ein ser kor populært tilbod dette har vorte på kulturfronten, legg han vekt på.
Tokvam ynskjer likevel at Nynorske Litteraturdagar kan få inn fleire støttespelarar slik at ein ikkje treng vera like avhengige av Aurland kommune.
Les meir om Nynorske Litteraturdagar i Aurland i LNK-avisa som kjem ut til helga.
