Den planlagde kommunereforma fører til at fire ledige stillingar som fylkesmenn no blir lyste ut som mellombelse i staden for åremål på seks år.
Dei fire stillingane med usikker sluttdato er fylkesmannsembeta i Nordland, Nord-Trøndelag, Møre og Romsdal og Østfold, fortel Nationen.
I utlysingsteksten står det at stillingane er ledige frå 1. november i år og varer fram til ei eventuell endring, seinast 1. januar 2019, fortel avisa.
Parlamentarisk leiar i Sp Marit Arnstad er kritisk til at stillingane som fylkesmenn blir lyste ut på denne måten.
– Det er klart at regjeringa vil slå saman fylkesmannsembete, men at dei er for feige til å seia det i valkampen, seier ho.
Ho peikar på at samanslåing av fylkesmannsembete ikkje berre får konsekvensar for dei som ønskjer å søkja på stillingane, men også for landbruket. Fylkesmannen forvaltar nemleg tilskots- og erstatningsordningane til landbruket.
– For eit landbruksfylke som Nord-Trøndelag vil det ha mykje å seia om landbruksdirektøren sit i Steinkjer eller Trondheim, seier ho.
Statssekretær Paul Chaffey (H) viser til at Stortinget har sagt at dei ønskjer at også fylkeskommunane tek «nabopraten» i samband med kommunereforma.
– Då er det naturleg at staten også ser på organiseringa si, seier han.
Han meiner det vil føra til mindre uvisse i neste omgang og at staten då kan tilsetja fylkesmenn på vanleg måte.
Han stadfestar at regjeringa ønskjer å slå saman fylkesmannsembete.
– Vi trur det er grunnlag for det. Vi har slege saman i Agder, og det kan vera aktuelt for fleire, seier han. (©NPK)
