Kulturminister Anniken Huitfeldt (Ap) opnar Dei nynorske festspela.
– Kulturminister Anniken Huitfeldt er den sjette statsråden som gjestar Dei nynorske festspela, og det er ei ære for både utøvarar og publikum at Huitfeldt er til stades, seier programansvarleg Åshild Widerøe i ei pressemelding.
Mange profilerte personar frå kultur- og samfunnsliv har opna Dei nynorske festspela etter at prinsesse Märtha Louise gjorde det første gongen i 1992. Festivalen er blitt opna både på flyplass og i gymnastikksalar, men frå 2000 har opningshøgtida vore arrangert i salen i Ivar Aasen-tunet.
Under Dei nynorske festspela vil Steinar Albrigtsen ha urpremiere på sitt nye låtmateriale saman med vokalisten Monika Nordli. Håvard Strand frå Volda er programleiar for opningshøgtida der prisen Årets nynorskbrukar også blir delt ut. Der kan ein også få med seg vinnar Maria Parr i samtale med Audhild Gregoriusdotter Rotevatn.
