Aspøy omsorgssenter i Ålesund har hatt tilsette frå 16 ulike nasjonalitetar på kurs i språk og kulturforståing.
– Eg er veldig glad for at eg har gått dette kurset. Det har gjort at vi er blitt opnare og tryggare. Nå vågar vi også å ta kontakt med dei pårørande, oppsøkje dei og tilby dei kaffi, seier Diba Maskurova til Sunnmørsposten. Ho er frå Tjetjenia og har budd i Noreg i sju år.
For å ha nok tilsette til drift heile døgeret, blei det i fjor vår henta inn vikarar frå alle verdshjørne. Mange av desse med sjukepleiar- eller hjelpepleiarfagleg utdanning. Då dei nytilsette frå Burma, Somalia, Latvia, India, Fillipinene, Keny, Venezuela, Ukraina, Thailand, Tjetjenia skulle kommunisere med svenktalande, sunnmøringar og folk med ulike dialekter, blei dei språklege utfordringane mange. Det same gjaldt kulturskilnader.
– Vi følte at språket var ein hemsko, seier prosjektansvarleg Anne Berte Hareide.
Det valde omsorgssenteret å gjere noko med. Språk- og kulturforståingskurset fokuserte på både dialekt og sunnmørske tradisjonar og historie.
– Kurset har gitt økt forståing mellom tilsette, samt pasientane og dei pårørande. Dette er merkbart, seier verksemdsleiar Henning Pilskog til Sunnmørsposten.
