Språkrådet har i fleire år kritisert språkbruken til Haukeland Universitetssjukehus i Bergen. No ber språkråddirektør Arnfinn Muruvik Vonen sjukehuset om å endre hjerteavdelinga til hjarteavdelinga.
Helse Bergen fekk i sommar eit brev, der dei blei pålagd å endre namnet på hjarteavdelinga. I brevet frå Språkrådet får sjukehuset også kritikk for å velje nynorske ord som er mest muleg like bokmål.
– Vi har fått ein del kjeft frå pasientar fordi vi bruker nynorsk. Vi prøver å bruke ord som flest muleg forstår utan å måtte tenke seg om. Derfor styrer vi til dømes unna føremon og røynsle. I stillingsannonsene skriv vi heller erfaring, seier kommunikasjonsdirektør i Helse Bergen, Mona Høgli, til Bergens Tidende.
Hjerte er ei sideform, og Høgli seier at sjukehuset bruker slike sideformer for å gjere språket meir lettfatteleg.
– Statsorgan skal ikkje bruke sideformer. Eg veit at det kan vere fristande for ein etat å velje ei form som er mest muleg lik mellom målformene, men sideformene er tilgjengelege for til dømes skuleelevar, ikkje statsorgan, peikar Muruvik Vonen på i ein kommentar til bt.no.
– Nå må vi altså slutte å bruke sideformer, men vi vil halde fram med å bruke hovudformer som er lette å forstå. Vi skal sjå meir på dette etter ferien, slår kommunikasjonsdirektøren ved Helse Bergen fast.
– Det er ikkje i tråd med norsk språkpolitikk å bruke hovudformer som er mest muleg felles for dei to målformene, seier Språkråd-direktøren til dette.
Haukeland Universitetssjukehus følgjer pålegget frå Språkrådet og endrar namnet til hjarteavdelinga, men ventar med å bruke pengar på å byte ut skilta på sjukehuset. Tidlegare har dei byta namn på augeavdelinga og øyre-nase-halsavdelinga.
lnk.no har tidlegare skrive om innspela helseføretaka i Bergen får frå Språkrådet. Her kan du lese dette.
