40 prosent meiner lokalt sjølvstyre må styrkast ved å overføre meir makt frå staten til kommunane.
Berre 14 prosent er ueinige i at lokalt sjølvstyre må styrkast på kostnad av statleg makt, viser ei undersøking som Sentio har gjort for Nationen.
Undersøkinga viser elles at 47 prosent av dei som bur på landsbygda, og 41 prosent av dei som bur i mindre byar, meiner kommunemakta må bli sterkare, men berre 26 prosent av Oslo-bebuarane meiner det same.
– Ein ser ein klar samanheng mellom bustad og synspunkt i denne saka, men det kan vere fordi spørsmålet vart oppfatta som at det handle om distriktspolitikk. Folk i Oslo kan lett meine at distriktspolitikk handlar om å ta frå Oslo og gje til andre plassar som ikkje har fortent det, seier valforskar og professor i statsvitskap Anders Todal Jenssen ved Noregs teknisk-naturvitskaplege universitet (NTNU). (NPK)
