Den kritikarroste debutboka til Maria Parr, «Vaffelhjarte», blir neste år å sjå som Barne-TV på NRK.
Maria Parr debuterte med «Vaffelhjarte» i 2005. Boka fekk svært gode kritikkar. Den unge forfattaren vart samanlikna med Astrid Lindgren og fekk ei rekkje prisar. No blir altså den prislønte boka til film.
Samlaget fortel at det skal lagast ein fjernsynsserie på sju episodar. Atle Knutsen, som har hatt regi på seriane «Linus i svingen» og «Jul i svingen» får ansvar for manus og regi. Serien skal spelast inn vinteren 2011 og skal sendast på NRK neste haust.
I boka følgjer vi to oppfinnsame niåringar gjennom eit heilt år. Boka er full av humor og elleville påfunn, men innimellom leiken tek boka opp alvorlege tema som vennskap, flytting, sorg og død og redsla for å mista nokon ein er glad i. Boka er seinare selt til seks land.
I fjor kom Maria Parr med si andre bok «Tonje Glimmerdal». Også denne boka har fått glitrande kritikkar og har vunne fleire prisar. Boka er førebels selt til fem land.(NPK)
