Hilde K. Kvalvaag fekk Brageprisen 2010 for ungdomsboka Fengsla.
Kunnskapsminister Kristin Halvorsen overrekte prisen. Ho meinte Kvalvaag er ein av dei skarpaste og mest personlege forteljarstemmene me har. I tillegg la ho vekt på at det er eit ærleg språk i boka som også har ein dramatisk slutt som vil sprenge grenser.
Boka Fengsla handlar om unge jenters testing av grenser knytt til seksualitet, kjensler og fornuft. Handlinga i boka finn stad mellom anna på ei fengselsøy, og fengselet på Ulfsnesøy i Hordaland er brukt som modell for staden.
– Det er spennande å skrive om og for ungdom. Å vekse opp er dramatisk. Opplevingar vert så sterke fordi dei opplever det for første gong. Grenseoppgangar vert så tydelege og det kan vere knytt til rus, sex og andre ting. Hovudpersonane i boka mi Fengsla går eit godt stykke over grensene, seier Hilde K. Kvalvaag i ei pressemelding frå Samlaget.
