Høgre ynskjer å melde Sauda kommune ut av LNK. Noko varaordførar Laura Seltveit (Ap) reagerer på.
– Eg er ikkje overraska, Høgre kjem med dette forslaget kvart år, seier Seltveit om budsjettforslaget om å melde kommunen ut av LNK.
I Høgre sitt budsjettframlegg har dei i tillegg til medlemskapen i LNK kutta driftsutgifter som midlar til Ryfylkefondet og til vennskapsssamarbeidet Sauda – San Juan del Sur. Høgre går ut frå at ein vil spare 30.000 kroner ved å kutte medlemskapen i LNK, sjølv om medlemskapen berre kostar 10.000 kroner.
– Ja, me har sett den korrigeringa. Eg veit ikkje kva som er grunnen til at 30.000 er opplyst, kanskje det er tatt høgde for reiseutgifter og anna, seier Laila Stødle (H) som la fram forslaget i formannskapet.
– Me brukar for mykje penger og må kutte der det svir minst, no må me styrke tilbodet til barn og unge så det blir vekst i Sauda, meiner Stødle.
Laura Seltveit meiner derimot kommunen kan vinne meir enn dei taper på medlemskapen i LNK.
– Som medlemskommune i LNK får me jo tilbod om gratisk språkkurs for tilsette i kommunen, det ville kommunen spart mykje på. Eg meiner nynorsken er ein viktig del av identiteten vår og me skal ikkje gløyme at skulane våre er nynorskskular, seier varaordføraren bestemt.
Laura Seltveit sit også i styret til LNK. Budsjettsaka skal avgjerast i kommunestyret onsdag 12. desemeber.
