Aina Basso og Inga H. Sætre er nominert til den nystifta Nordisk råds barnebokpris.
Basso er nominert for «Inn i elden», Inga H. Sætre for «Fallteknikk». Frå det samiske språkområdet er forfattar Signe Iversen og illustratør Sissel Horndal nominert for «Mánugánda ja Heike».
Prisen er på 350.000 danske kroner, og blir delt ut for første gong i samband med Nordisk råds sesjon i Oslo i slutten av oktober.
– Eit løft for barne- og ungdomslitteraturen var ei av hovudprioriteringane under den norske formannskapen i Nordisk ministerråd i fjor. Med desse nominasjonane er det teke eit viktig steg for å likestille barne- og ungdomslitteratur med all anna litteratur, seier kulturminister Hadia Tajik (Ap).
Reglane og nominasjonsprosessen for den nye prisen er dei same som for Nordisk råds litteraturpris. Juryen er sett saman av 23 representantar frå ni land. Det er to nominerte bøker frå Noreg, Danmark, Finland, Island, Sverige, Færøyane, Grønland, Åland og det samiske språkområdet. (NPK)
