Ivar Aasen sitt dikt ”Nordmannen” speler hovudrollen i Aker-selskapa sin nye reklamefilm. Målet er å vise fram norsk industri og dei verdiane dei tilsette skapar.
– Akers reklamefilm med diktet ”Nordmannen” av Ivar Aasen vil setje språkpolitiske spor etter seg, seier direktør Ottar Grepstad i Ivar Aasen-tunet i ei pressemelding. Filmen ”Made by Norway” blei vist første gongen onsdag og er eit industripolitisk innspel frå Aker i valkampen.
– Filmen reindyrkar poesien og industrien og målber stor sjølvtillit, seier Grepstad vidare.
Han legg også vekt på at bedrifter som Stabburet og Lerum har gjort nynorsk reklame meir vanleg.
– For få år sidan sa framståande reklamefolk at dei heller ville lage reklame på urdu enn på nynorsk. Seinare har mellom andre Lerum, Stabburet og Sætre brukt nynorsk i reklame. Det er også blitt så vanleg å snakke dialekt i Noreg at reklameprodusentane sakte følgjer etter. Når nynorsk er eit vanleg språk for Aker, vil det vere det for andre også. Eg trur denne filmen vil setje spor etter seg i norsk reklame, seier Grepstad.
På nettstaden aasentunet.no har Ivar Aasen-tunet laga ei eiga temaside om det viktigaste og mest brukte diktet Ivar Aasen skreiv. Temasida fortel mellom anna historia om diktet og viser korleis det blei ein populær allsong.
