– Ein politikar utan ein eller annan form for blogg eller sosial nettverk-profil har eg problem med å tru vil høyre på innspel frå veljarane, seier kommunikasjonsrådgjevar Bente Kalsnes.
Ho meiner lokalpartia allereie no burde få på plass kva målsetjing dei har, kva som er dei viktigaste sakene, kven dei skal nå og kva kommunikasjonsverktøy dei bør bruke i valkampen.
Og politikarane burde etablere seg på nett, for å kome i dialog med veljarane.
– For det er jo det sosiale medium med kommentarfelt handlar om, at ein kan gå i dialog. Når det er sagt bør politikarane velje kva kanal eller plattform dei vil setje fokus på for å få størst gjennomslagskraft, sidan det truleg berre er dei største partiapparata som kan vere overalt.
– Kva bør dei starte med?
– Dei bør starte med ei lærevillig haldning. Lytt, lær og test ut dei nye, interaktive kommunikasjonsverktøya som blogg, Twitter, Facebook, Flickr, Vimeo eller YouTube. Spør om råd, ver opne og fortel kvifor de ynskjer å bruke sosiale medium, er rådet frå Kalsnes.
Men ein må vere aktiv skal det ha nokon effekt.
– Dersom dei fullstendig neglisjerer innspel frå andre lesarar, ikkje les kommentarar eller svarar i kommentarfeltet, ser eg ikkje så stort poeng med å bruke sosiale medium for ein politikar.
Les meir om korleis kommunikasjonsrådgjevarar og folk flest meiner lokalpolitikarane bør kommunisere i valkampen i neste utgåve av LNK-avisa.
