130 postkontor kan bli nedlagt og det kan gå mot postombering så sjeldan som ein dag i veka over store delar av landet, heiter det i ein rapport som tek for seg posten ti år fram i tid.
– Rapporten viser paradoksalt nok at auka konkurranse gjer at posttenestene blir dyrare for staten, seier samferdsleminister Magnhild Meltveit Kleppa til Nationen.
Rapporten fastslår at dersom overføringane Posten får i dag ikkje blir auka med 500 millionar kroner årleg til 2,5 milliardar kroner i året, vil tilbodet bli bygd ned til tre dagars postombering for kvar fjerde husstand, ein postdag i veka for 15 prosent av husstandane og fem for dei resterande 60 prosentane. A-post vil bli avvikla og mellom 110 og 130 postkontor vil bli lagt ned.
Utsiktene er teikna opp av analyse- og rådgivingsbyrået Oslo Economics, som på oppdrag frå Samferdsledepartementet har teke for seg korleis Post- Noreg vil sjå ut i framtida, dersom postdirektivet til EU blir innført.
Det er ei eventuell opning for å konkurranseutsette posttenestene også for post under 50 gram som vil svekkje inntektsgrunnlaget til Posten, heiter det i rapporten.
Ei slik konkurranseutsetjing vil skje samstundes som papirpost blir stadig mindre aktuelt for stadig fleire: Adressert brevpost har gått ned med 30 prosent frå år 2000 til 2009, kundebesøk i postkontor har gått ned med 20 prosent sidan 2003, og dei neste ti åra blir det forventa at nedgangen held fram.
No åtvarar Kleppa mot å innføre direktivet:
– Dersom me vedtek å innføre direktivet, så kan det kome inn leverandørar og skumme fløyten ved at dei konkurrerer berre i dei mest lønsame delane av verksemda. Då må me betale ekstra for å oppretthalde likeverdige tenester i heile landet, seier ho. (NPK)
