NRK-journalist Astrid Brekken (67) får Kulturdepartementets nynorskpris for journalistar i 2010. Prisen blir delt ut under Dei nynorske festspela i Ørsta 25. juni.
Astrid Brekken er i dag mest kjent frå P2-programma «Sånn er livet» og «På livet laus», men ifølgje juryen er det knapt eit emne ho ikkje har vore innom sidan ho tok til i NRK i 1971.
Ho var også med og starte kvinnesaksbladet Sirene i 1973, var redaktør i Syn og Segn 1980–83 og har vore aktiv i alt frå Norsk språkråd til Forum for Systemdebatt. Sidan 1976 har ho også drive heimegarden i Lesja.
«Astrid Brekken har i ein kvinnealder vore markant til stades i norsk samfunnsdebatt på mange arenaer, og heile tida har ho hatt eit svært medvite forhold til nynorsk», heiter det blant anna i grunngjevinga frå juryen, som også meiner at prisvinnaren er «ein nyfiken og intellektuell journalist, oppteken av korleis vi lever liva våre i både bygd og by, lokalt og internasjonalt».
Prisen er på 50.000 kroner og eit norsk kunstverk.
Tidlegare prisvinnarar er Linda Eide, NRK, Kjell-Erik Kallset, Dagsavisen, Odd Reidar Solem, TV 2 og Ronny Brede Aase, NRK P3. (©NPK)
