Trond Helleland (H) i justiskomiteen på Stortinget meiner ein bør stoppe prøveordninga med E-val, skriv Aftenposten.
Kommunaldepartementet skal innføre prøveordning med elektronisk stemmegivning via heimepc’en i 2011. Departementet meiner dette kan få fleire unge til å stemme, skriv Aftenposten.
Men det betyr også at foreiningar, interesseorganisasjonar og kyrkjelydar kan setje opp ein PC i sine lokale og la folk stemme der. Utan at det er eit krav om at ingen skal sjå kva ein stemmer på, som i eit vanleg vallokale.
– Dette bryt jo mot sjølve hovudregelen. I valhandboka frå OSSE står det svart på kvitt at «enhver stemmegivning utenfor stemmelokalet kompromitterer prinsippet om hemmelig valg», seier Helleland.
Han får støtte frå jussprofessor Eivind Smith ved Universitetet i Oslo.
– Skrinlegg forslaget. I alle fall den delen som går på e-val utanfor vallokala. Det kan godt hende ein kan få til ein elektronisk ordning innafor. Men dette handlar om grunnleggande tillit til valsystemet i Noreg, seier Smith til Aftenposten.
