Berre eitt av fire statsorgan oppfyller mållova på ein måte som kan kallast god, heiter det i ein rapport frå Språkrådet.
Den siste mållovsrapporten frå Språkrådet syner til dømes at berre halvparten av alle offentlege skjema finst på nynorsk, trass i at det er eit krav at alle skjema skal finnast på båe målformer. På nett har derimot nynorsktilfanget auka. Statlege nettsider har no omlag 10 prosent innhald på nynorsk, mot 5 prosent for nokre år tilbake. Kravet er at minst 25 prosent av tekstane på nett skal vere på nynorsk.
Statsorgana var gjennom St.meld. nr 7 (2005–2006) «Målbruk i offentleg teneste» pålagde å oppfylle krava i mållova til punkt og prikke innan 2008. Mållovsrapporten avslører no at 3 av 4 organ ikkje gjer ein god nok jobb.
– Leiarane i statsorgana må sende tydelege signal til organisasjonen om at mållova skal følgjast. Utan slike signal har det liten verknad at eit statsorgan arbeider godt med å bruke og utvikle den språkkompetansen som skal til, seier fagkoordinator Sigfrid Tvitekkja i Språkrådet. Ho peiker på at departement som har hatt nynorskbrukande statsråd går frå for låg nynorskprosent til å oppfylle krava i mållova på kort tid.
