Mållaget vil samarbeide med Riksmålsforbundet.
– Framleis er me nok meir usamde enn samde, men på to punkt er me heilt einige med Riksmålsforbundet: god språkrøkt og meir offentleg normaltalemål, seier Håvard B. Øvregård, leiar i Noregs Mållag.
Noregs Mållag inviterte Riksmålsforbundet til haustseminar i Bergen for å halde ei innleiing om utfordringane for eit tospråkleg Noreg, fortel mållagsleiaren i eit intervju på nettsidene til organisasjonen.
Riksmålsforbundets bidrag var éi av fleire innleiingar som tok utgangspunkt i Språkmeldinga, der det blir slått fast at norsk språkpolitikk er å ta vare både på bokmål og nynorsk.
Det var tyskprofessor ved Universitetet i Oslo John Ole Askedal som representerte Riksmålsforbundet, og han takka for den overraskande invitasjonen.
– Etter ein langvarig strid, så treng me etter Språkmeldinga ikkje å stridast lenger. Me kan like godt leve i fred med kvarandre, sa Askedal til Bergens Tidende.
Samde i noko
Håvard B. Øvregård meiner at det er viktig å sameine dei språkpolitiske kreftene i Noreg.
– Det er ikkje altfor mange som er opptekne av språkpolitikk i Noreg. Riksmålsforbundet har synspunkt og meiningar som det er viktig å ha med i eit språkpolitisk ordskifte, sa Øvregård til avisa.
– Framleis er me nok meir usamde enn samde, men to punkt einast me om: begge er opptekne av god språkrøkt, sjølv om det er på vegner av eige språk. Og me er samde om at det burde vere meir normaltalemål i allmenta.
Han ser ikkje vekk ifrå at det kan bli fleire møte.
– Eg går ut ifrå at me skal møtast igjen, det er godt å ha den kommunikasjonslinja. Eg vonar dette er berre det fyrste steget, sa Øvregård til avisa. (NPK)
