Kunnskapsminister Kristin Halvorsen (SV) vil framleis ha karakter i sidemål. Dermed er nynorsken redda, meiner mange.
Departementet kunngjorde i dag at ordninga blir som før, og at det framleis vert både standpunktkarakter og eksamen i sidemål det siste året på ungdomsskulen og på vidaregåande skule, skriv NRK Hordaland.
– Vi beheld systemet slik det er i dag. Vi held fram dagens eksamensordning og med tre standpunktkarakterar i norsk: munnleg og skriftleg i hovudmål og sidemål, seier kunnskapsministeren til NRK.
Ministeren meiner norske skuleelevar må bevise at dei meistrar både nynorsk og bokmål.
– Det gjer me fordi vi meiner det er viktig at levane må visa kva dei kan, både i hovudmål og sidemål, når dei går ut av 10. klasse og ut av vidaregåande, slår Halvorsen fast.
Vedtaket haustar ros i nynorsk-verda.
– Mållags-SV har definitivt vunne fram. Det betyr at samstillinga av nynorsk og bokmål frå Stortinget i 1885 faktisk vert ståande fast. Halvorsen har heldigvis høyrt på oss, seier Oddny Miljeteig som er aktiv i både mållaget og SV til NRK.no.
