Avtroppande leiar i LNK la i sin leiartale vekt på at LNK har ein jobb å gjere i lag med kommunane også i framtida.
Astrid Myran Aarvik peika på LNK som ein solid organisasjon som har hatt ein stabil medlemsmasse og lojale medlemer i 20 år.
Ho trekte fram arbeidet med kursa På saklista som har vore og er svært populære språkkurs for kommunane. Også informasjonsarbeidet organisasjonen gjer med informasjon gjennom LNK.no og LNK-avisa er viktig, og satsinga mot barn og unge, gjennom nettstadane Magasinett, Framtida og Pirion meiner ho organisasjonen kan vere godt nøgde med.
– LNK har i mange år vore ein viktig premissleverandør i språkspørsmål inn mot statlege organ. I sist utgåve av LNK-avisa var fleire statsrådar inne på korleis dei i sine ulike posisjonar har gått til LNK og fått støtte og gode råd. Det håpar og trur eg både statsrådar, ordførarar, rådmenn og andre tilsette vil gjera i framtida også, sa Myran Aarvik.
I framtida blir det stadig viktigare å vere bevisste dei endringane språket og nynorsken står overfor, og der vil LNK spele ei viktig rolle overfor kommunane også i framtida. LNK må halde fram med nynorskarbeidet mot barn og unge. Det er ungdommen som skal styre kommunane om nokre år, minna ho om.
