Færre enn 200 menneske i verda snakkar språket iwaidja. Smarttelefon og lesebrett skal no vere med og halde det vesle språket i hevd.
Iwaidja er eit språk som er i bruk på øya Croker Island utanfor Northen Territory i Australia. På skulen deira har dei åtte lesebrett, og der har dei no installert den splitter nye appen Ma! Iwaidja.
Appen har 1 500 oppslagsord, ein kan omsetje mellom engelsk og iwaidja og ein kan lytte til orda og lære seg rett uttale. Det finst også ei rekkje mykje brukte fraser som ein kan lære å seie og skrive. Med ein ordmakar kan ein leike seg med orda og lage eigne setningar og fraser.
– Urfolket i Australia er svært engasjerte brukarar av mobil teknologi, så ideen var å nytte seg av det, seier Bruce Birch, prosjektkoordinator for Minjilang Endangered Languages Publication til CNN.
Ma! Iwaidja er ein gratis app og er så langt lasta ned 350 gonger. Neste steg for appen blir å lage ein database som gjer at brukarar kan lage og dele eigne oppslagsord. Tanken er at ein også skal gjere denne delen meir munnleg, slik at brukaren kan spele inn ord i staden for å skrive.
Parallelt med dette jobbar Bruce Birch med tilsvarande appar for andre truga språk. Ei bok med fraser for språka Mawng og Kunwinjku skal vere klar neste år. I tillegg er ein tom app under utvikling, den skal brukarar kunne fylle sjølve med språkdata dei samlar sjølve, uansett språk.
