Herøy: Lokale forfattarar sel best

Kom ikkje her med internasjonal erotika og kongelege biografiar. I Fosnavåg er det lokale bøker som sel best.

Dei tre mestseljande bøkene i bokhandelen i Fosnavåg no er alle skrive av lokale forfattarar. Det er boksansvarleg hjå Libris, Karete Johannesen, svært nøgd med.

– 10 av 20 bøker på bestseljarlista vår er faktisk lokale, smiler ho. 

Mat på topp

Øvst på bestseljarlista ligg kokeboka Go’biten, skrive av to lærarar ved Herøy vidaregåande skule, Olaug Hatløy og Ingebjørg Lyster. I denne boka har dei ikkje berre samla gamle lokale oppskrifter, dei har også dratt inn historia frå plassen og dei har brukt lokale fotografar. Boka vart lansert med brask og bram, med boksignering og servering av smaksprøver i butikken.

Politi Tone Nørvåg sine bøker om politihunden Falk har òg slått godt an i Fosnavåg, og den nyaste boka hennar ligg no på andreplass på bestseljarlista. Nørvåg sine bøker er geografisk plasserte i nærmiljøet hennar slik at folk kan kjenne seg att.

– Vi har aldri hatt så lang signeringskø som då Nørvåg kom ut med første boka i fjor, seier Johannessen. Det er viktig, meiner ho, at forfattarane byr på seg sjølv og ikkje gøymer seg vekk så fort dei er ferdige med boka si.

Kjensfolk

Trude Teige er eit kjend namn for tv-sjåarane, og ho har også gitt ut ei rekkje bøker dei siste åra. Krimboka Svik er den tredje mest selde boka i Fosnavåg no.

– Trude Teige bur ikkje her lenger, men det er klart at når ho kjem hit så vil folk treffe ho. Vi har hatt lansering med ho både i fjor og i år.

Det er nok ikkje heilt uvanleg at lokale bøker klatrar fort opp på salslistene, seier Johannessen, spesielt i mindre kommunar.  Ho trur oppskrifta på ein slike suksessar er at mange er med og løfter dei lokale fram i lag.

– Vi for vår del frontar dei godt i butikken, og har ein eigen avdeling for lokale forfattarar.

Det er også avgjerande at mange kjenner forfattarane i byen og kjem for å møte dei når dei kan.