Jazz- og visesongar Beate Slettevoll Lech, forfattarane Marit Eikemo og Frode Grytten og songar Tom Roger Aadland er nokre av dei som skal underhalde på Ivar Aasen-tunet dette halvåret.
Første post i vårprogrammet er konserten SANS og samling med lokale musikarar 25. januar. Beate Slettevold Lech, som er nominert til Spellemannprisen i kategorien Viser, kjem til Aasen-tunet 1. februar.Frode Grytten vitjar Ørsta og Aasen-tunet 9. februar, medan Marit Eikemo kjem på kvinnedagen. Tom Roger Aadland har hausta mykje ros for omsetjingane av Bob Dylan sine tekstar til nynorsk. Torsdag 22. mars tek han med seg Dylan på nynorsk og eit knippe nye låtar med sterke, nynorske tekstar til Aasen-tunet.
Dei minste kan sjå fram til to høgdepunkt denne våren. 12. februar er det Operabarnetimen, ei humoristisk og energisk framsyning av og med Ensemble Fanfaronner. I påskeveka har Tunkatten Lurivar for første gong lagt lure planar.
Dei nynorske festspela har 20-årsjubileum i år og i helga 28. juni til 1. juli kjem det mange besøkande både deltakarar og artistar til Aasen-tunet. Tysdag 27. mars blir programmet lansert. Temaet i år er Songen og festspeldiktar Arne Moslåtten er til stades under lanseringa.
Utover våren kjem Guri Aasen og Andrine Longva Kopperstad med forteljeframsyninga Fiskarkona og døtrene hennar, publikum kan høyre filosof Gunnar Skirbekk og Norsk Ordbok presenterer ordnytt. 18. april i Bergen, presenterer Ottar Grepstad Språkfakta 2012, siste nytt om språk i verda og Noreg.
