Som så mange gonger før var innbyggjarane i rogalandskommunen Utsira blant dei mest gåvmilde i årets tv-aksjon. I snitt gav dei rett over 200 innbyggjarane 352 kroner kvar til Norsk Folkehjelp sitt mineryddingsarbeid.
Svalbard er likevel i særklasse med eit snitt på 516 kroner fordelt på dei litt over 2500 innbyggjarane.
Landsgjennomsnittet blei i år på 42 kroner per innbyggjar, og totalt fekk tv-aksjonen inn over 208 millionar kroner. Dette resultatet er ifølgje NRK det nest beste nokonsinne.
– Dette er eit fantastisk resultat som viser at det norske folk støttar den viktige jobben med å rydde miner, seier leiar i Norsk Folkehjelp si mineavdeling, Per Neergaard, til NRK.no.
– Dette frigjer meir tid og pengar til å rydde rydde miner og redde liv, held han fram.
Generalsekretær i Norsk Folkehjelp, Liv Tørres, er overvelda:
– Dette beløpet er langt over det vi hadde håpa på, det er heilt fantastisk! Dette gir oss mulegheita til å rydde endå meir land fritt for miner, klasebomber og blindgjengarar som ligg igjen etter krig og konflikt. Vi er svært takksame for dei bidraga som har kome inn i dag. Og så må vi få rette ei stor takk til alle de verkelege heltane som kvar dag går ut og gjer ein livsviktig jobb i minefelta, og som har delt sine erfaringar frå Bosnia, Libanon, Tadsjikistan, Laos, Vietnam og Sør-Sudan, seier Liv Tørres i ei pressemelding.
– Norsk Folkehjelp har hatt TV-aksjonen to gonger tidlegare, men dette slår alle tidlegare rekordar for vår del, legg ho til.
