Samferdsledepartementet opnar no for at mobiltelefonen kan brukast som elektronisk billett i kollektivtrafikken.
– Bruk av mobiltelefon som elektronisk billett, vil gjere det endå enklare å reise kollektivt. Vi må ha på plass ein nasjonal standard for mobiltelefonbillettering, slik at vi har eit betalingssystem som fungerer likt over heile landet, seier samferdsleminister Magnhild Meltveit Kleppa.
Vegdirektoratet får i oppdrag å leie utviklingsarbeidet med den nye tekniske standarden for mobile løysningar. Arbeidet skal vere ferdig i første kvartal 2012 slik at mobile betalingsløysningar kan takast i bruk i løpet av 2013.
Mobilleverandørar må tilby neste generasjon mobiltelefonar på den norske marknaden for at dette nye betalingssystemet skal kunne takast i bruk. Den nye generasjonen mobiltelefonar inneheld såkalla NFC-teknologi.
– Her er det mange aktørar som trekkjer i same retning, og eg har derfor trua på at næringa vil fungere som ein god medspelar i arbeidet. Målet er å gjere det meir attraktivt å bruke kollektivtransport, seier samferdsleministeren.
Fylkeskommunar og NSB deltar også i utviklingsarbeidet for det nye betalingssystemet.
Over 500.000 kundar over heile landet bruker i dag elektroniske reisekort. Den teknologiske utviklinga har gått frå elektroniske kort (med magnetstripe) og smartkort (med chip) til kontaktlause kort og til mobiltelefon (med NFC). Neste generasjon mobiltelefonar kan derfor også brukast som kort.
