Noreg bør ikkje bruka tvang for å busetja flyktningar. Det kan føra til større konfliktar og dårlegare integrering, meiner KS.
I forslaget til ny busetjingsmodell for flyktningar, som blei sendt ut på høyring i slutten av januar, føreslår departementet at fylkesmannen får ein tilvisingsrett overfor kommunane. KS, interesseorganisasjonen for kommunane, meiner dette er feil veg å gå.
– Det er fare for at ein slik modell vil auke konfliktnivået lokalt og dermed svekkja integreringsarbeidet, heiter det i uttalen frå KS.
Organisasjonen meiner elles det trengst fleire tiltak for å korta ned tida flyktningane må venta før dei får ein stad å bu. Ikkje minst meiner KS at saksbehandlinga i staten frå det er vedteke at flyktningane får opphaldsløyve til busetjingvedtaka blir fatta, må gå raskare.
I snitt tek denne prosessen i dag 3,4 månader. KS meiner målet må vera at ventetida blir korta ned til ein månad. Organisasjonen føreslår vidare at det blir oppretta ei form for økonomisk påskjøning for kommunar som er flinke til å ta imot flyktningar.
KS meiner mange kommunar også kan bli flinkare til å skaffa bustad for flyktningar raskare. For å letta dette arbeidet er KS open for å ta ei meir aktiv rolle – helst i eit samarbeid med Husbanken, heiter det i brevet frå KS.
Med betre rammevilkår meiner KS at det bør vera mogleg å få til frivillige avtalar der kommunane pliktar å ta imot talet på flyktningar dei har sagt ja til innan ein akseptabel frist eller oppmoding frå departementet. (NPK)
