No er det kome ei nettbasert oversikt over nynorsk læremateriell for vaksne minoritetsspråklege.
Oversikta finst på heimesidene til Nynorsksenteret i Volda, og her finn ein forslag til læreverk for elevar med og utan skulebakgrunn og lærebøker for utanlandske studentar.
Lista er blitt utarbeidd for ei ressursgruppe nedsett av Vox, nasjonalt
fagorgan for kompetansepolitikk. Gruppa har fått i oppgåve å sjå på kva læremiddel som finst på nynorsk for minoritetsspråklege vaksne og ikkje minst sjå kva det trengst meir av.
Arild Torvund Olsen frå Nynorsksenteret sit i gruppa som har fått denne lista utarbeidd. Han seier det no finst fleire læreverk i norsk for vaksenundervinsinga, i tillegg til at det er mange einskilde bøker som fyller ut andre fagområde. Men enno er det mykje ein kan ønskje seg for å få eit godt tilbod av læremiddel for vaksne.
– På Nynorsksenteret ønskjer vi til dømes å sjå meir på arbeidsretta tekstar, altså tekstar som vaksne vil ha bruk for å lese eller skrive i yrkeslivet, seier Torvund Olsen.
Gruppa som arbeider saman med Vox består av folk frå LNK, Ulstein kompetansesenter, Nynorsksenteret og lærarar frå Gloppen og Førde kommunar.
